BUG Gymnastics Club

FAQ's

Watter dissiplines bied die klub aan?
Die klub bied ARTISTIESE gimnastiek vir skoolgaande dogters en seuns aan. Daar is ook BEGINNERS GIMNASTIEK vir kinders vanaf voorskoolse ouderdom. Die beginnersgimnaste doen die BADGES-program en kan later oorskakel na die amptelike SAGF-program vir kompeterende artistiese gimnastiek. Evaluasie vir die BADGES word jaarliks in September/ Oktober gedoen en gimnaste ontvang hulle Badge en sertifikaat by die jaarlikse prysuitdeling in November. Die kompetisie-seisoen vir die Levels-gimnaste is hoofsaaklik van Januarie-Oktober, met die Nasionale kompetisies wat einde September/ begin Oktober plaasvind.

Wat is Artistiese Gimnastiek?
Artistiese gimnastiek vir dogters en seuns is die algemeen bekende gimnastiek wat ‘n mens op die TV sien wanneer dit die Olimpiese spele is. Die dogters het vier apparate, nl. die brug (uneven bars), balk (balance beam), spronge (vault) en vloer (floor). Die seuns het ses apparate, nl. die vloer (floor), spronge (vault), brug (parallel bars), rekstok (horizontal bar), ringe (rings) en beuelperd (pommelhorse).

Die Suid-Afrikaanse Gimnastiek Federasie (SAGF) is die nasionale beheerliggaam vir gimnastiek in Suid-Afrika en is by die Internasionale Gimnastiek Federasie (FIG) geaffilieer. Alle klubs in Suid-Afrika moet by SAGF affilieer. Die huidige sisteem in Suid-Afrika werk soos volg:

Dogters Artisities Vlakke 1-7: Voorgeskrewe reekse soos uitgewerk deur die tegniese komitee van SAGF, met die Vlak 5-7 reekse wat bepaalde vereistes het en die gimnaste hulle eie reekse kan uitwerk.

Dogters Artistiese Vlakke 8 tot Senior Olimpies: Eie keuse reekse soos uitgewerk deur die gimnaste, met bepaalde vereistes waaraan voldoen moet word.

Seuns Artisities Vlakke 1-7 & Elite 1-4: Voorgeskrewe reekse soos uitgewerk deur die tegniese komitee van SAGF.

Seuns Artistiese Vlakke 8 tot Senior Olimpies: Eie keuse reekse soos uitgewerk deur die gimnaste, met bepaalde vereistes waaraan voldoen moet word.

Waar is die klub geleë?
In Malherbe straat op die PUK kampus van die Noordwes Universiteit, Potchefstroom. kliek hier om padkaart te sien...

Vanaf Klerksdorp: volg die N12 tot in Potchefstroom (Nelson Mandela Rylaan). Draai links in Beyers Naude laan en hou reguit aan tot by Esselen straat. Draai links in Esselen straat en hou aan tot by Universiteitshekke. Gaan in by Esselenstraat-hekke van die kampus, draai regs om die sirkel. Eerste groot gebou aan die regterkant (groot saal met vensters reg rondom net onder die dak) is waar die oefeninge plaasvind.

Vanaf Johannesburg: volg die N12 tot in Potchefstroom (Nelson Mandela Rylaan). Draai regs in Beyers Naude laan en hou reguit aan tot by Esselen straat. Draai links in Esselen straat en hou aan tot by Universiteitshekke. Gaan in by Esselenstraat-hekke van die kampus, draai regs om die sirkel. Eerste groot gebou aan die regterkant (groot saal met vensters reg rondom net onder die dak) is waar die oefeninge plaasvind.

Wanneer is die oefentye?
Die oefentye vir die verskillende groepe is soos volg, maar hou asb. in gedagte dat dit moontlik kan verander indien dit nodig is:

Dae	Tyd	Groep
Ma & Wo	14:15 - 15 :15	Beginners & G-Y-M-Badges (seuns & dogters)
Ma & Wo	14:15 - 15:45	Kompetisiegimnaste (Vlak 1 - Vlak 3 seuns)
Ma & Wo	14:15 - 17:00	Kompetisiegimnaste (Vlak 4 - Vlak 8 seuns)
Ma & Wo & Vry	15:00 - 17:00	Kompetisiegimnaste (Vlak 4 - Vlak 8 hoërskool dogters)
Ma & Wo	15:30 - 17:00	Kompetisiegimnaste (Vlak 1 - Vlak 8 laerskool dogters)
Vrydae	15:00 - 17:00	Geskeduleerde ekstra oefentyd vir kompetisiegimnaste

Hoe oud moet my kind wees om in te skryf?
Dogters en seuns moet 5 jaar oud wees om in te skakel by die klub.

Watter klere moet my kind aantrek?
Volgens die klub se grondwet geld die volgende reëls t.o.v klerasie:

Die amptelike oefendrag van die klub is ‘n swart, rooi en/of heldergroen lycra leotard.
Enige ander oefenklere word ook toegelaat, solank dit nie die gimnas strem in die oefening nie (geen rokke/ rompe/ jeans).
Die kompetisieleotard van wit, swart, rooi en groen lycra is ‘n voorvereiste vir deelname aan kompetisies en kan twee keer per jaar deur die klub bestel word. Betaling moet die bestelling vergesel.
Die klub beskik ook oor ‘n klubsweetpak. Alle gimnaste word aangemoedig om ‘n klubsweetpak aan te koop. Klubsweetpakke is verpligtend vir gimnaste wat aan kompetisies deelneem.
Alle klerasie kan deur die bestuurslid van klerasie aangekoop word. Bestellings word twee keer per jaar geneem en betaling moet bestelling vergesel.
Tweedehandse gimnastiekklere word, waar moontlik, ook deur die bestuur beskikbaar gestel aan klublede. Enige klubklere wat te klein is of nie meer gebruik word nie, kan aan die bestuur oorgedra word.

Wat is die tarriewe?
a. Afrigtingsfooie
Die afrigtingsfooie is vooruitbetaalbaar voor die 7e van elke maand vir 10 maande, en kan jaarliks, kwartaalliks of in 10 maandelikse paaiemente betaal word.

b. Aansluitingsfooie
Eenmalige Aansluitingsfooi word betaal wanneer 'n gimnas by die klub aansluit.

c. Kompetisie fooie
Gimnaste wat aan die Noordwes Kampioenskappe wil deelneem vir provinsiale kleure moet by Noordwes Gimnastiek en SAGF affilieer. Die registrasiefooie per kompeterende gimnas beloop ongeveer R400. Dit sluit die administrasiefooi vir Noordwes Gimnastiek in en is in Maart betaalbaar. Siende dat die standaard van gimnastiek in die provinsie baie hoog is, sal slegs gimnaste wat deur die hoofafrigters geïdentifiseer word vir kompetisies ingeskryf word. Kompetisiefooie is vooruitbetaalbaar voor elke kompetisie. Gimnaste wat onttrek nadat die inskrywings deurgestuur is (of nie deelneem sonder voldoende vooraf kennisgewing nie), is steeds verantwoordelik om die inskrywingsgelde te betaal.

NB. Indien u kind ophou met die gimnastiek moet daar vooraf ‘n maand betaalde kennis gegee word. Gimnaste wat vir meer as 1 maand/ 4 weke afwesig is sal, mits daar ‘n reëling met die klubbestuurder getref is, as onaktiewe lede beskou word en hulle plekke sal aan nuwe gimnaste gegee word.

Grondwet-reëls i.t.v finansies

Die gimnaste betaal ‘n eenmalige aansluitingsfooi met toetrede tot die klub. Die bedrag word jaarliks deur die bestuur vasgestel.
Afrigtingsfooie word jaarliks deur die bestuur vasgestel. Hierdie fooi moet VOORUIT betaal word, en elektronies in die klub se bankrekening inbetaal word.
Afrigtingsfooie word vir tien maande van die jaar gehef, aangesien vakansieprogramme en oefenkampe gedurende die skoolvakansies aangebied word. Dit is in paaiemente betaalbaar, hetsy maandeliks of kwartaalliks.
Indien ‘n gimnas se afrigtingsgelde met meer as twee maande agterstallig raak, en daar geen verdere reëlings met die klubbestuur getref is nie, kan afrigting aan sodanige gimnas(te) gestaak word.
Enige reëling ten opsigte van betaling van fooie moet met die voorsitter/klubbestuurder en tesourier getref word.
Alle gimnaste wat aan kompetisies deelneem moet by Noordwes Gimnastiek en die SAGF registreer. Hierdie fooie word deur die betrokke liggame bepaal en moet deur alle gimnaste betaal word. Kennis van die fooie sal deur die bestuur en/of afrigters aan die gimnaste gegee word, en betaling geskied ook deur middel van die koevertjiestelsel.
Inskrywingsgelde vir kompetisies is VOORUIT betaalbaar en geen inskrywing sal sonder betaling van gelde geskied nie.
Enige gelde, ook vir klere, kan elektronies inbetaal word.

Hoe kan ek betaal?
Alle betalings aan BUG Gimnastiek kan direk in die klubrekening gemaak word:

Rekeninghouer:                       BUG Gimnastiek
Bank:                                       ABSA
Takkode:                                 632005
Tipe rekening:                         Spaar
Rekeningnommer:                   678223972

Meld asb. in u verwysing so volledig as moontlik vir watter gimnas(te) die gelde is en ook waarvoor, bv. Pieter Steyn NOV afrigting.

Wie rig my kind(ers) af?
Die klub het ‘n groot groep SAGF-gekwalifiseerde en ervare studente- & voltydse artistiese afrigters wat jaarliks by die Suid-Afrikaanse Gimnastiek Federasie (SAGF) affilieer (die kwalifikasies is die enigste erkende gimnastiekkwalifikasies wat in die land bestaan). Baie van die afrigters is oud-gimnaste en kompeteer tans ook nog op Senior vlak. Meeste van die afrigters is ook SAGF-gekwalifiseerde beoordelaars, waarvan party tot op Internasionale vlak beoordeel.

Moet my kind inskryf vir kompetisies?
Daar is twee afdelings in die klub, namelik kompetisie-gerigte deelname en ontwikkelingsdeelname. Die klem binne altwee hierdie afdelings is op genot in deelname en oefening, en om die kind holisties te ontwikkel. Vir die gimnaste wat toppresteerders wil wees in gimnastiek is daar geleentheid om hulle volle potensiaal te bereik, en vir die ontwikkelingsgimnaste is daar geleentheid om die gimnastiekoefeninge as deel van hul motoriese ontwikkeling te doen. Vir die ontwikkelingsgimnas is die klem dus nie op die najaag van pryse en toekennings nie. Indien ‘n gimnas egter kompetisie-gerigte deelname kies is daar ‘n aantal kriteria waaraan hy/ sy moet voldoen.
Beginnergimnaste jonger as 8 jaar oud neem as 'n reël NIE aan kompetisies in die eerste jaar deel nie, mits die ouers en die hoofafrigters 'n ander reëling getref het.

Kriteria:

Deelname aan eerste Klubkompetisie van seisoen en moet ‘n gemiddelde punt, soos jaarliks deur die hoofafrigters en bestuur vasgestel, hê om aan die tweede klubkompetsie deel te neem.
Deelname aan tweede Klubkompetisie van seisoen en moet ‘n gemiddelde punt, soos jaarliks deur die hoofafrigters en bestuur vasgestel, hê om by Noordwes Gimnastiek en SAGF te registreer.
Deelname aan uitnodigingskompetisies wanneer gemiddeld by tweede klubkompetisie hoër is as die gemiddelde punt soos jaarliks deur die hoofafrigters en bestuur vasgestel.